Jumat, 20 Desember 2013
Kali ini aku mau share salah satu
cerpen Bahasa Bali yang ditulis oleh salah satu temen sewaktu SMA. Tulisannya
selalu bikin terkagum-kagum. Pengen buktiin? Well, read this one
please :)
Jaman Online
Oleh : Ida Ayu Ketut Wulandari
Tua-tuané ngorahang, dugas jaman iluné kaling ké tivi gelahang, ajin radio
ningehang ka pisaga. Baan dotné nawang, kanti menék tembok ka pisaga. Kéto
masih lampu, i pidan nganggon sentir. Aget-aget né ngelahan nyidaang nganggo
stromking. Jaman jani lén suba sengaran jagaté, makejang sarwa
modérn. Makejang nganggo listrik uli nyakan, nerik kanti ngumbah masih
nganggo listrik.
“Jaman jani téknologi
sayan canggih, ngelah tivi, kulkas ,mesin cuci lan AC to suba biasa,
kondén jangkep rasané yén sing ada ané madan laptop maimbuh modem, yén suba
ngelah ané dadua ento kadirasa ajin nongos di jumah nawang sekancan informasi
kanti ka dura negara.Yén sing miluin ilehan jamané sinah iraga dadi jlema
tungap, apabuin di éra globalisasi buka jani. Cerik-cerik jani yén dueg
di wewengan akademik dugén percuma, perlu masi isin téknologi, to makrana tiang
maang Dé Wisnu meli sakancan barang éléktronik,” kéto raosné Mé Jempiring
kurenan Perbekelé nutur di malun umahné.
Né lénan bengong ningehang Mé
Jempiring nutur, prajani makejang dot meliang pianakné laptop apang dueg buka
pianak Perbekelé. Makejang suba makeneh-keneh lakar ngadep sampi utawi céléng
anggon meli laptop.
“Yén pianak tiangé tuturin tiang kanggoang malu di warnét, kenehné
dong suba ngelah laptop apang aluh ngaé tugas nanging jokan pipisé,” kéto
pesautné Mé Luh Sandat marep tekén Mé jempiring.
“Beneh masih kéto, nanging yén di warnét ramé sing nyidaang maénggal-énggalan
ngaé tugas, apabuin Dé wisnu tugas kuliahné begeh kadirasa kanti
magadang, anak sing ada warnét mabukak kanti makepeteng,” penimbal Mé Jempiring
tekén Mé Luh Sandat.
Sing kuangan ané ajumanga tekén Ibu Perbekel, apa buin yén nuturang Dé Wisnu
ané kuliah di Badung. Né lénan suba ngerunyuk ulun atinné ningehang,
pragat nyombongang awak mwah pianak. Dé Wisnu luas ka Badung nganggo celana jéans selem, jakét barak negakin
satria FU mahélm AGV, misi mesuang Black Bérry lakar up-date status
di twitter, jeg sing kuangan gaya.Né makada truna-trunané setata iri tekén ya,
nanging Liu anaké luh bajang di désa dot mademenan tekén Dé Wisnu.
“Mé, tegarang to tingalin Dé Wisnu, sing kuangan entut magenep nyidaang
gelahanga, jani koné ngelah laptop ajak modem. Adep céléngé Mé,
beliang tiang laptop apang aluh ngaé tugas,” kéto abetné I Wayan Darma ngarémon
marep méménné.
“Cening, ngudiang Cai sing ngelah
pangrasa dadi pianak! Awak lacur, petilesang ibané! Mémé masogsag ngalih gaé,
gaé kahuripané! Mémé ajak padidi dini ngedéang Wayan. Cai ubuh bapa, I Bapa
suba makelo ngalain mati. Mémé bapanné Dé Wisnu ngelah ya brana anggonna nuukin
né kitanga tekén Dé Wisnu. Nah, apang Cai sing sanget maselselan lakar kaadep
céléngé! Beliang mémé laptop nanging Nyoman suud
kuliah! To pakpak laptopé di jumah!” sinted pesautné Mé Luh Sandat tekén
pianakné I Wayan Darma.
Darma bengong di malun koriné,
kijep-kijep peningalanné ningehang Méménné nguél. Tusing bani ngemikang bibih
apabuin masuang munyi.
Dé Wisnu masekep di kosné ngajak
timpal-timpalné magutet di malun laptopé ada né mukak facebook,
twitter, main game, mwah ané lénan. Potokan roko mabrarakan. Gelas kopi kondén
masutsut. Pamulesanné maadukan sing karoan.
“Mani teka suba barangé!” kéto raosné
Dé Wisnu.
“Dija Cai maan Dé Wisnu?” pesautné I
Murda dot nawang.
“Pih nyampain sajan Cai! Dé Wisnu
sing kuangan timpal. Icang suba mesen di Malaysia. Buin telun anti duén di
malun jebagé, petengné jeg karoan lakar mapésta,” pesautné Dé Wisnu.
Uli semengan Dé Wisnu ngajak timpal-timpalné majujuk di malun kori kosné,
ngantiang pakét né suba pesenna. Disubané bakatange pakété, ngadébras Dé Wisnu
ngajak timpal-timpalné macelep ke kamar kos.
“Né mare madan hidup,” kéto kehengan Dé Wisnu iteh mapésta narkoba ngajak
timpal-timpal di kosné.
“Sajan té Dé, yén sesai kéné sing lakar ngarasanin kéwehné idup, apabuin stres
ngitungang tugas-tugas kampus,” kéto pasautné I Murda.
Sedek iteh ajaka telu ngisinin lega sambil makedékan, sing tawanga polisi suba
di malun kori kosné. Dé Wisnu, I Murda lan Rizal makesiab ningalin polisi
naldalan pistol. Ia abana ka kantor polisi limané mabergol. Maniné korané liu ngortiang indik
pajalanné. Tiga
mahasiswa pésta narkoba di sebuah kost di Jl. Ahmad Raya. D W (20), A R (21)
dan W M (20) kedapatan sedang mengonsumsi narkoba jenis écstasy.
Pak Perbekel bengong maca berita, ketug-ketug bayuné. Nlektekang foto pianakné
di koranné. Mén Jempiring ping telu ping pat nyelé bayu dasdasan
ngelimuh.
“Lek suba tiang jani Beli, lakar ngédéngang mua apabuin lakar ngorta ajak
timpalé. Ané tawang tiang Dé Wisnu pianak tiangé tuah bagus lan dueg,” kéto
abetné Mé Jempiring nyeléntod di samping kurenanné sambilanga
ngerémon .
“To madan nak cerik tumbén ngedat, asing toliha apang gelahang. Kanti dot
makpak narkoba. Bes lebihan Nyahi ngulurin pianak. Kondén kénkén suba lebihan
ngajumang pianak di sisin margané mwah di pisaga, né jani apa lakar ajumang yén
suba kanti tangkep polisi,” kéto pitutur Perbekelé tekén kurenanné.
Kramané telah uyut di sisin margané ngomongan Dé Wisnu. Ada ané
ngemogaang apang mapenjara, ada masi ané kondén ngugu.
“Kéné pianakné ané sai ajumanga tekén Ibu Perbekel, kéné solahné di gumin anak.
Jani, jelé adan désané ulian Dé Wisnu,” kéto kehengané Mé Luh Sandat marep
tekén timpalné mwah pisagané rikala matemu di pekenné.
Makejang ngaba orte ané anyar. Ada ané meli koran, nengil di malun
tiviné, ada masih ané inceg ngalih berita di internét.
“Ade dingeh di beritané anak ulian online koné meli barang totonan. Pih guminé
suba lebihan canggih, kayang barang ané tawah-tawah masih nyidaang beli ulian
negak duén.Né sanget ngranaang angob, kénkén undukné sangkan nyidaang lolos
barang totonan di Bandara. Suba sayan aéng guminé kayang dedaran masih ada né
tawah-tawah. Nasi ajak lawar darin, wareg! Kekéto dedaran ané tawah
payuan kadaar,” kéto tuturné I Wayan Darma
“Jani tingalin Dé Wisnu, apa buin lakar iriang Wayan, suba tangkep polisi. Mémé
Bapanné masi lek ngédéngang mua. Jani Wayan melahang ngaba awak, kanggoang apa
ja né gelahang. Da ngameledang ané tusing nyidaang lakar beli apabuin né
tuara-tuara. Ngaé tugas kanggoang malu ka warnét. Pang sing cara Dé Wisnu.
Kudu-kudu ngelah laptop, senggak Méménné ajin nongos koné maan informasi.
Tusing tawanga ya masih ngalih informasi ané tawah-tawah,” kéto pitutur Mé Luh
Sandat tekén pianakné.
Pak Perbekel ngakuin pianakné pelih di malun kramané, tur nunas pangampura
sawiréh Dé Wisnu suba nyelékang adan désa. Adan désanné usak ulian pianak
Perbekelé. Kadirasa telah suba munyiné Pak Perbekel mapidarta di banjar marep
krama Désanné.
Dé Wisnu jani suba makirim ka Panti Réhabilitasi. Liu anaké nelokin. Uli mémé
bapanné, timpal sekolah kanti prajuru adat masi milu nelokin Dé Wisnu.
“Kéné suba upah anaké lebihan nawang,
kanti né tawah-tawah masi tawang Gedé. Jani, dini malu ngoyong, di Panti
Réhabilitasi. Bapa ajak Mémé pepes lakar nelokin. Melahang ngaba awak, eda buin
malaksana ané jelé,” kéto pitutur Pak Perbekel rikala nelokin pianakné di Panti
Réhabilitasi.
Dé Wisnu nganggut-nganggut duén
ningehang. Saha ngeling sengik-sengik ngelut méménné.
